विभिन्न जिल्लामा भएका सवारी दुर्घटनामा परेर ३ जनाको मृत्यु भएको छ । मोरङ, सिरहा र रुपन्देहीमा भएका सवारी दुर्घटनामा परेर ३ जनाको मृत्यु भएको हो । मोरङको मिक्लाजुङ गाउँपालिका–३ टाँडी रमितेस्थित सडकमा मे। २ प ९०९७ नम्बरको मोटरसाइकल अनियन्त्रित भई शनिबार दिउँसो दुर्घटना हुँदा चालक उर्लाबारी नगरपालिका–४ बस्ने १७ वर्षीय आरब डाँगीको मृत्यु भएको छ । दुर्घटनामा गम्भीर घाइते भएका उनको अरनिको अस्पताल उर्लाबारीमा उपचारको क्रममा मृत्यु भएको हो ।
त्यस्तै सिराहाको लहान नगरपालिका–१९ छरापट्टीस्थित सडकमा बीआर ३२ एसी ४१२९ नम्बरको मोटरसाइकलको ठक्करबाट पैदलयात्री सोही नगरपालिका–२३ गढीया बस्ने ५५ वर्षीय लखन मोतीको शनिबार राति मृत्यु भएको छ । ठक्करबाट गम्भीर घाइते भएका उनको प्रादेशिक अस्पताल लहानमा उपचारका क्रममा मृत्यु भएको हो । हाल फरार मोटरसाइकल चालकको प्रहरीले खोजी गरिरहेको छ । उता रुपन्देहीको बुटवल उपमहानगरपालिका–१३ जितगढीस्थित सडकमा लु १ ज ४४६६ नम्बरको बोलेरोले लु १५ प ३४ नम्बरको मोटरसाइकललाई शनिबार राति ठक्कर दिँदा मोटरसाइकल चालक अर्घाखाँची सन्धिखर्क नगरपालिका–४ वाग्ला बस्ने ३१ वर्षीय खुमा भुसालको मृत्यु भएको छ ।
दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको एडमसिटी अस्पताल बुटवलमा उपचार भइरहेको छ । हाल फरार बोलेरो चालकको प्रहरीले खोजी गरिरहेको छ । सबै दुर्घटनाका सम्बन्धमा प्रहरीले आवश्यक अनुसन्धान भइरहेको जनाएको छ ।
