रसुवाको गोसाइँकुण्डमा डुबेका दुई जना युवाको शव भेटिएको छ । स्थानीय र नेपाली सेनाको सहयोगमा कुण्डबाट शव निकालिएको रसुवाका डीएसपी हेम शाहीले बताए ।
आइतबार स्नान गर्ने क्रममा मोरङ बेलबारी घर भएका २८ वर्षीय मनोज न्यौपाने र विराटनगर महानगरपालिका–३ ढाटका २६ वर्षीय सुजन ढकाल डुबेर बेपत्ता भएका थिए । उनीहरूको खोजीमा सशस्त्र प्रहरी, सेना र नेपाल प्रहरीका सुरक्षाकर्मीहरू खटिएका थिए । सोमबार बिहान दुवै जना मृत भेटिएको डीएसपी शाहीले जानकारी दिए ।
शव पोस्टमार्टमका लागि अस्पताल पठाउने तयारी भइरहेको डीएसी शाहीले बताए । मृतकका आफन्तहरूले सिम्रिक एयरको हेलिकप्टरमार्फत शव गोसाइँकुण्डबाट काठमाडौँ ल्याउने तयारी गरिरहेको बताइएको छ ।
